Anakbayan nagpahigayon og Coastal Clean-up, nanawagan og pagdepensa sa kinaiyahan

June 20, 2010 | DAVAO CITY  –Ang mga kabatan-onang miyembro sa Anakbayan- Piapi Chapter uban ang mga barangay leaders ug mga residente ang mipahigayon og usa ka Coastal Clean-up Drive karong adlawa. Ang maong lakang sa mga kabatan-onan buot magpakita sa ilang  paningkamot nga ampingan ug panalipdan ang kinaiyahan alang sa sumusunod nga mga henerasyon.

Sumala ni Sheena Duazo, ang tigpamaba sa Anakbayan-Southern Mindanao Region, ang mga basurang ilahang nakulekta gikan sa mga baybayong lugar ning lungsod, nagahulagway lamang kuno sa kawad-on og pagpakabana sa panggamhanan  diha sa pagpanalipod sa kinaiyahan bisan pa daghan kining mga aktibidad nga nagapakaron-ingnon nga naga-kampanya alang sa proteksyon niini.

Nabalaka ang mga kabatan-onan sa ilang kaugmaon nga sa dili madugay, moabot gayud ang yugto nga nagkakunhod na ang mga natural nga rekurso, ug wala na sab makaon ang kadaghanan sa katawhan, epekto sa pagkaguba sa kinaiyahan.

Matod ni Duazo,  “Kung aduna may angayang basolon niini, ang gobyerno gayod. Gawas sa wala’y maayong implementasyon sa balaod, padayon nga nagatugot ang panggamhanan sa pagsulod sa mga  dagkong langyawng korporasyon aron panamastamasan ang nasudnong bahandi ingon man aron pahimuslan ang kusog pamuo sa katawhang Pilipino sukli sa gamayng sweldo ug benepisyo”.

“Kining mga basura sa baybay, gamay lamang kini kon itandi sa grabeng pag-antos sa atong kinaiyahan. Daghang mga pabrika nga ang operasyon anaa sa daplin sa dagat nga nagapagawas og mga industrial wastes, apan kulang ang regulasyon sa DENR. Halapad sad sa atong mga kabukiran ang kalbo na dili lang tungod sa illegal logging activities kundili tungod sab sa mga legal logging nga ginatugotan sa gobyerno. Dugang pa niana mao ang operasyon sa mga dagkong minahan sa kabukiran,” matod pa ni Duazo.

“Ang sakit pa niini, sa pagkaguba sa kinaiyahan, pipila ang nalipay, pipila ang niganansya. Gani, daghang mga Lumad sa kabukiran ug mga Badjao sa kadagatan ang nadislokar, padayon sab ang militarisasyon aron sa pagpahawa sa mga tawo nga naa duol sa mga minahan o logging areas. Dili kini ang kalamboan nga ginapangandoy sa katawhan,“ dugang ni Duazo.

Ang maong Coastal Clean-up Drive gamayng inisyatiba lamang sa mga kabatan-onan. Apan pinaagi niini nga mga lakang, mapakita nila ang ilang pagpakabana alang sa kinaiyahan ug mapadayag nila ang ilang mensahe nga ang tinuorayng kalamboan wala nagapanamastamas sa kinaiyahan. Gani, ang panawagan sa grupo, mao ang usa ka malungtarong kalamboan alang sa tanang katawhan.#