Kadamay ginondena ang usbaw sa presyo sa kuryente

PRESS RELEASE | August 9, 2010 | Dakbayan sa Davao- Gikondena sa grupong KADAMAY ang usbaw sa singil sa kuryente nga ipatuman sa Davao Light and Power Company (DLPC) karong bulana. Ang maong pagsaka sa presyo sa singil makapasamot kuno sa kalisod nga ginasagubang sa katawhan ilabina nga walay hunong ang pagtaas sa presyo sa lana ug uban pang batakang palaliton.

Matud pa ni Franchie Buhayan, Tigpamaba sa KADAMAY “Ang labihang maipit niing pag-usbaw sa bayronon sa kuryente mao ang mga kabus nga mga pamilya nga maglisod naman gani og pagpalit sa pagkaon ug pagpaeskwela sa ilhang mga anak.”

Dugang pa ni Buhayan, “ Samtang walay igong serbisyo nga ginahatag ang gubyerno, kini pa ang nagaduso sa pagpataas sa presyo sa kuryente pinaagi sa mga programa ug balaod susama sa EPIRA.”

Gihagit usab ni Buhayan ang gubyernong Aquino nga barugan ang pagbasura sa balaod nga Electric Power Industry Reform Act kon EPIRA kay mao kini ang nag-unang hinungdan nganong paturagas nga makapasaka og presyo ang mga dagkong kapitalista sa kuryente.

Mahinumdumang isa si Aquino sa mga kongresista kaniadtong 2001 nga mibabag sa EPIRA maong angay kuno niyang barugan ang pagbasura sa maong balaod, matud pa ni Buhayan.

Mibahad ang grupong KADAMAY nga magpahigayon kini og mga dagkong lihok protesta kung ipadayon sa DLPC ang 0.8 sentimo kada kilowatt hour nga dugang singil sa presyo sa kuryente.